السلام عليكم ورحمة الله وبركاته
هذه بعض الأمور التي تقف في وجه الأخوة في الزواج الملتزم
بدءا من مراحل قبل الزفاف حتي الزفاف
نبدأ مع بعض فترة قبل الزفاف ( أكشن)
(المشهد) عبارة عن شاب ملتزم ومش لازم يكون من أبوين ملتزمين مثله وهذا الغالب الأن ويريد الزواج
طيب يطلب من الأب والأم الزواج نشوف الحوار اللي دار
الأب : ياسلالالالالام يا حمادة ياحبيبي ده اليوم اللي كنت بستناه أنا عندي ليك حتة عروسة بنت واحد صاحبي إسمها سوزي 23 سنة أيروبيكس جيمانيزوم تجيد الإنجليزية تأتي بالطباخ ( الأب طبعا عايزها مصلحة )
ولا أقولك أيه رأيك في بنت عمك
الأم : لالالالالالالالالالالالا أبدا ده انا قاريا الفاتحة مع خالته عشان بنتها أبدا لازم يأخد بنت خالته والبنت يابني بتصلي وبتاعة ربنا
طبعا ده كله وصاحبنا قاعد عايز يتكلم وهما عمالين يفصلوا في العروسة بدماغهم
الإبن : يا جماعة إنتوا مش فاهمين أنا عايز واحده ملتزمة زيي لاني ناوي أتجوز زواج متدين زواج ملتزم عشان ربنا يبارك لي في زواجي وفي حياتي
الأب والأم يكشروا عن أنيابهم ويحتدم النقاش
الأب: يعني عايز تتجوز عفريت ولا أيه ( عذرا لأخواتي العفيفات المنتقبات )
الأم: أبدا ما يحصل ليه يابني هو أنت عملت حاجه وحشه في دنيتك
الإبن : يا أمي أنا عايز أتجوز جواز شرعي
الأب : يعني أيه تتجوز من غير أما أفرح بيك وأعزم صحابي والناس تشوف عروستك
الأم: يعني كمان عايز تتجوز سوكيتي من غير ولا زفة ولا رقاصة ليه يعني ده
بن عمك فرحه يتحكي بيه وإنت مش أقل منه
لا ولا بنت خالة أمي بنتها فرحها كانوا بيتحاكوا عليه
الأب : وإنت مالك إزاي طيب إنت عرفت البنت اللي عايز تتجوزها شوفت شكلها
عارف أهلها
الإبن : لأ طبعا
الأب : لأ طبعا ……. إتفرجي ياهانم شوفي إبنك بيقول أيه
الأم : يابني ربنا يهديك إحنا عايزين مصلحتك
وينتهي الحوار الساخن بعد ساعات من المداولة والمجادلة بكلمة واحده إعمل اللي يريحك ( ده الحوار بإختصار )
نييجي لمرحلة إختيار العروسة
يبدأ الشاب في التفكير طيب أجيب منين العروسة اللي أنا نفسي فيها اللي نفسي أرتبط بيها أمي وأبويا وخلاص ولا حتي إخواتي البنات ( وده بيبقي من العقبات الكبيرة )
طيب ولو روحت لأخ متدين عشان يشوف لي أخت منين أضمن إنها في الباطن أخت صالحة لي وتنفع لي وتبدأ الوساوس
طيب لنفرض بقي إنه لقي العروسه تعالوا نشوف في الرؤية الشرعية
بدأت الحرب فلتدق الطبول
كل واحد من الفريقين – قصدي العروسين – مجهز ورق أسئله أكن العريس داخل لجنة إمتحان في معهد إعداد الدعاة وكأن العروسة عالم من علماء هذا العصر وزمن الإمتحان ساعة ويوجد مراقبين في اللجنة ( الأب ) وبدون ورق إجابة (إمتحان شفوي)
طيب لنفرض أحسن الظروف وتم القبول والزفاف والحمد لله
بعد الزفــــــــــــــــــــــــــاف
تبدأ المشاكل فعائلة العريس والعروسة ليس من الواجب أن يكونا في إلتزامهما
تييجي مثلا زيارة ليهم
أخو العريس أو بن عمه أو حد من صحابه والعروسة ماطلعتش تسلم عليهم
تلاقي الغمز واللمز والكلام بقي اللي ماحد يسلم منه وينتشر الكلام في العيله عنها
إنها مش عايزه تقابل حد ومتكبره وماطلعتش تقابلنا قرفانه منا وهكذا ونفس الكلام علي العريس طبعا سيقال ولكن يكون أزيد علي العروسة للأمانة
مثلا فرح واحد قريبه حبيبه صاحبة أي حد
طيب أنا ملتزم لو ماروحتش يبقي أنا مش بتاع واجب وكمان ده في أغاني ولو راح العروسة ملتزمة وهتعلق له حبل المشنقة ونفس الكلام علي الطرف الأخر
نييجي في رمضان
مثلا راح يعتكف
تبدأ أمه بقي شفتي يا أختي طفشته من البيت أمال متجوزاه ليه وهكذاااااااااا
وهكذا دواليك
أنتظروا الجزء الثاني في الحلقة القادمة
إن شاء الله
Posted by Ahmed Nagaty on يونيو 8, 2008 at 1:07 ص
السلام عليكم و رحمة الله و بركاته
ازيك يا شملولاوى باشا
أنا لحد الان مش عارف اسمك الحقيقى ايه للأسف !
ألف مبروك على المدونه الجديده و أتمنى لك مزيدا من المواضيع و الكلمات الهادفه
وبجد المقال دا أكثر من رائع
و يحكى الواقع الأليم اللى بنعيشه
و يارب يصبر كل الأخوه و الأخوات الذين يريدون اظهار شعائر الدين و يبعد عنهم الفتن
و ربنا يهدينا أجمعين
Posted by shamlolawe on يونيو 12, 2008 at 3:08 ص
أنا أسمي محمد وأهلا بيك ياباشا
ومادام عجبك بإذن الله أنزلك بالجزء الثاني ياعم ولا تزعل نفسك
Posted by mmm on سبتمبر 7, 2008 at 5:33 ص
بالرغم ان تعليقي متأخر شوية لكن عجبني قوي الموقف اللي كاتبينه ده لانه فعلا حقيقي وبتواجهه اخوات واخوة كتير جددددا
وخصوصا ورقة الاسئلة اللي بيتسأل فيها الطرفين بالرغم ان الزاوج السليم مش بالاسئلة والرد عليها ردا صحيحا
الموضوع كله يكمن في تطبيق الاجابة عملي وليس شفوي
يوجد كثيرا من الاخوة والاخوات يعلمن الحق جيدا ولكن معظمهم لا يعملوا به
فما فائدة تلك الاجابات والعمل لا يصدقه
فالواقع اكبر دليل علي ذلك وليس الاجابات الشفهية
ما تريده الفتاة مثلا وهذا من رأيي كفتاة مسلمة واتمني ان اكون ملتزمة وهذا يعلمه الله
لا تريد الفتاة الا زوجا صالحا تقيا نقيا يعينها علي طاعة الله وتتمني ان تكون الزوجة الصالحة الطائعة لزوجها فيما يحبه الله ويرضاه وان يكون زوجها رفيقا بها وصدره يتسع لها ويحتويها
لا يكون مثلا يصدر الاوامر والنواهي وهي عليها الطاعة فقط بل يجب ان يكون بينهما مودة ورحمة
وعن رأيي الزوجة تقاس انها ملتزمة يكفي انها ترتدي الحجاب الشرعي وان تكون ملمة بباب الطهارة وان تحفظ القران ولا يشترط مثلا ان تكون تحفظه كاملا بل يجب ان تعمل به اولا وتطبقه في حياتها واهم شئ في اي انسان مسلم ملتزم ان يكون صاااااااااااااادق في كل شئ اهم صفة الصدق فيأتي بعدها كل شئ اذا وجدت صفة الصدق .ويجب ان تتصف البنت بالهدوء واللين والصبر كي تعين زوجها علي متاعب الدنيا
هذا من رأيي
اذا كنت مخطئة ارجو ان تفيدوني بذلك
اما بالنسبة لورقة الاسئلة تلك فأجد انها وسيلة عائق كبير للاخوة والاخوات ويمكن ان تكون في سبب عدم زواج الاخوة اني اعرف اخوات كثيرة ترفض تلك الاسئلة فالبنت احيانا كثيرة تتلعثم امام الاخ الذي يسألها وتشعر انه يمتحنها وممكن يكون من ناحيتها قبول له ولكن اسلوبه في عرض الاسئلة وايضا حينما لا تستطيع ان ترد علي اسئلته وتري وجهه مثلا ممتعضا تشعر انه رفضها او انها رسبت في الامتحان وبعد ان تكون كانت متقبله الاخ تشعر بالضيق منه لامتعاضه حينما الاخت تلعثمت في الاجابة مثلا وهنا يجيئ دور الاخ الذي يقول ان الاخت رفضته ولا يعرف لماذا؟
ولكن لا يشعر ان الفتاة ماهي الا انسانة رقيقة لا يصلح ان يعاملها بخشونة او حتي ان يعاملها بتجاهل وكل هذا لانها لم تكن علي علم او ليس لديها علم كافي بكل العلوم الشرعية او انها لم تختم القران مثلا
كل هذه الامور امور واهية يمكن ان تساعدها انت بنفسك اذا وجدت فيها الصلاح او وجدت انها تخطو اول خطواتها نحو الالتزام فهذا يشرفك بأن تأخذ اجرها وتعينها علي طاعة الله
فوالله هناك اخوات كثيرات ماشاء الله يخطو اول خطواتهم نحو الالتزام ويريدون منك المساعدة كي تنجو بها الي بر الامان
اذا وجدت تلك الفتاة التي تتشوق الي ان تكون فتاة ملتزمة لا تتردد اخي فأنت تستحقها وهي تستحقك ان شاء الله
Posted by سائره الى الله on نوفمبر 16, 2008 at 2:47 ص
السلام عليكم ورحمة الله وبركاته
جزاك الله خيرا على انك بتكتب فى الموضوع دا ونحاول نلاقى طرق حل ازاى نحل المشكله ديه مع اهلينا
لاسف بعض الاخوات الا من رحم ربي ممكن يستسلمو بسبب اهلهم ويتزوجو شباب مش ملتزم وطبعا فيه اخوات بيصبرو ويدعو الله ان يرزقهم الزوج الصالح الملتزم
لكن سبحان الله الاستخاره ليها تأثير كبير في اذا كانت الاخت او الاخ يوافق ولا لاء
لكن مش بالاسئله سبحان الله
بعد كدا كله بيبان على اخلاقه ربنا يرزقنا واياكم حسن الخلق
لكن موضوع جميل وجزاك الله خيرا وفي انتظار الجزء الثانى