مانيش عايزة خلاص حاجة
ولا محتاجة انا لحاجة
ولو عايزة صحيح حاجة
مخليتوليش ولا حاجة
عموماً بصوا فيه حاجة
هقولها بس محتاجة لعقول تفهم
ولو حاجة
مهيش مفهومة او حاجة
نفسرها بكام حاجة
نوضحها بكام حاجة
وأهى حاجة مع حاجة
هتظهر وتبان لنا حاجة
وانا ما بخفش من حاجة
مانيش مسنودة ولا حاجة
لكن ما بخفش من حاجة
لكن فرضاً لو هقول حاجة
هيحصل إيه ؟؟؟ ولا حاجة
هيعملوا إية ؟؟ ولا حاجة
و بعد الشر بعد الشر لو واحد من القاعدين
من السامعين من الضالين
فِهِم حاجة هَيعملوا إيه ؟؟؟؟
اكيد برضُه ولا حاجة
فنتوكل على الستار لوجه الله نقول حاجة
فيه ناس بتعيش علشان حاجة
وناس بتموت علشان حاجة
وناس بتموت على الحاجة
وناس تديلك الحاجة
وتبقى ليها محتاجة
وناس تديلك الحاجة
و تاخد ادامها ميت حاجة
وناس تكبر تكون حاجة
و ناس تصغر علشان حاجة
وناس منظر ومش حاجة
وتلقاه كبيرحرس ونفير عليه منظر
وهو جبان وشيخ منصر
ولا يبـنش عليه حاجة
كلامى يا خلق فيه حاجة؟
لحد دلوقتى فيه حاجه؟
كلام عادى وبسيط جداً ولا فِهشِ ولا حاجة
ما انا ما أقدرش أقول حاجة
صحيح نفسى أقول حاجة وميت حاجة
لكن مش قادرة اقول حاجة
لأنى لو هقول حاجة
هييجى ناس بتوع حاجة
وياخدونى ورا الحاجة
وهو لو سمع حاجة
هيعملوهالى ميت حاجة
عموما بصو لو واحد من القاعدين
عاوزنى أبلغه بحاجة
يقول مايخفش من حاجة
نعم فيه إيه؟
لالالالالأ مافيش سرقه
ولا تهليب ولا تهريب ولا حاجة
وبتقول إيه
مصمصوا إيه؟ وخصخصوا إيه؟
ده كله كلام مفيش حاجه
قضية إيه؟
ياشيخ روح خلاص مافيش حاجه
حرامى إيه ؟ ولَكّح إيه؟وهرب إيه؟
شــفـافـيـه ومافيش حاجة
وبتقول إيه؟لالالآلأ عـــيب
لافيه تدليسولاترقيص
ولا تدبيس ولا حاجه
سمع مع هووووس
انا حاسسة انه فيه حاجة
دقيقة سكات لَتبقى حداد
انا حاسسه انه فيه حاجة
زمنكوا ياخلق فيه حاجة
ولازموا كام وميت حاجة
ده لو يعنى إذا كان فيه حاجة
انا عن نفسى مش حاسسة ولا بحاجة
ولا متضايقة ولا حاجة
سعادتك برضه مش زيـى مافيش حاجة ؟
أهـه بيقول مافيش حاجة
جنابك برضه مش زَيـىِ وعلشان زيي مافيش حاجة
أهـه بيضحك بيقول مافيش حاجة
ما أنا قولتلكو من الأول مافيش حاجة
عليا النعمه يا اخوانا مافيه حاجة
ورحمة ابويا ويا أبوك على إللّى جابوك ما فيه حاجه
وعهد الله . وعهد الله. وعهد الله
ما خللولنا ولا حاجه
بقلك ايه خلاص خلص و فركش
يلا يا اخونا مفيش حاجه
الشاعرة المصرية : إيمان محمد بكري محمود
Posted by volda on سبتمبر 2, 2008 at 6:24 ص
ازيك يا شملول …. ايه الاخبار يا جميل
انا متابعك في منتدى الديفيدي
وعمال الف في المدونه بتاعتك دي مش لاقيلها اخر يا عم
عجبتني اوي بتاعت حمراااااااا ……. وحاسس انها هتفضل حمرا على طول
المهم علشان ما اطولش عليك
خد دي …
مفيش حاجة…؟
دي بتقولي مفيش حاجة..!!
وإيه يعني
ما انا من شهر أو حاجة
كنت بقول مفيش حاجة..
وبعد شوية جت حاجة
وجه واحد وقال حاجة..
وعمل بعديها ميت حاجة..
وقبل الناس ما تيجي تناقشه ع الحاجة
قال استنوا
ده فيه تاني وقال حاجة
وواضح إن فيه حاجة..
لأن الناس
سابوا الأول ومسكوا التاني بالحاجة
قالوا له : ازاي واحد زيك ولا حاجة
يقول حاجة
عن الحاجة اللي ما يصحش
نقول عنها ولا حاجة…؟؟
لأ استنوا
ما خدتوش بالكوا من حاجة..؟
ده فيه واحد – وماسكينه – عشان قال حاجة مش ممكن تضر الحاجة دي ف حاجة
ولا ح تضرنا ف حاجة…
وواحد تاني سايبينه بيعمل فينا ميت حاجة..
ودمر ستميت حاجة..
ومحدش قال له ولا حاجة..
وبعد ده كله بتقول لي مفيش حاجة..؟؟
ده فيه حاجة وفيه حاجة وفيه حاجة..!!
لأ استنوا..
فيه واحد فيكوا قال حاجة..
بتقول إيه ..؟
علي الصوت مانيش سامع ولا حاجة…
فيه حد ورايا..؟
بتقول إيه…؟
على دماغه لابس حاجة..؟
بتقول إيه..؟
على كتافه باين حاجة…؟
ف إيده لاسلكي بيقول له
تجيب كله على الحاجة وما تفوتش ولا حاجة…؟
ولا يهمك
أنا ما بخافش من حاجة ومش باقي على حاجة
أي..!
إيه ده..؟
ده بيضربني ع الحاجة…!!
يا باشا خلاص مفيش حاجة
وانا مابقولش ولا حاجة
أنا اطلع مين…؟؟
ده أنا واحد شارب حاجة….
Posted by shamlolawe on سبتمبر 2, 2008 at 4:56 م
جميله جدا بس تأليفك
عشان أنشرها لوحدها بس
منتظر ردك
Posted by volda on سبتمبر 2, 2008 at 10:39 م
لا مش من تأليفي
انا كنت بدور على مفيش حاجه بتاعت الشاعره اللى فوق خالص
بس الكلام ده من اكتر من 3 سنين
لقيت اللى انا كتبتهولك دا
انشرها وقول مؤلف مجهول
Posted by shamlolawe on سبتمبر 3, 2008 at 1:11 ص
ههههههههههه
لازم برضك ندي الحقوق لأصحابها ياباشا
يعني مواضيع المكملات والمنشطات هنا بكتب مين أصحابها
لازم نعرف مين صاحبها
Posted by volda on سبتمبر 6, 2008 at 6:57 ص
طيب خلاص
هحاول ادور على اصحابها كده
وانت كمان دور من ناحيتك
انت راجل صاحب مدونه ….. !!!!
Posted by shamlolawe on سبتمبر 6, 2008 at 4:32 م
ياعم صاحب مدونة أيه بس
بإذن الله خير