خراب يادنيا عمار يادماغي

معلش الموضوع المره دي محزن شوية أو ممكن يضايق الناس
بس دي قصه حقيقية واقعية جدا وهتلاقوها أكيد وأكثر كمان
في مصر

دي حكاية الست عواطف بس نبدأ الحكاية من الأول
البداية شهر رمضان المبارك منذ حوالي سنتين
كنت بروح أصلي والحمد لله كل يوم التراويح بأحد المساجد
المشهورة في منطقتي لعذوبة صوت القارئ
ولكن كان يستوقفني إمرأة مسنة ترتدي الخمار الأزرق
الذي يتضح منه القدم وإنه إتبهدل من كثرة الإرتداء
وتمسك بعكاز أو عصا تستند عليها وتقف مثل التائهين
تنظر يمينا ويسارا وعينيها يذرفان الدموع ولكن لم أكن
أدري أذلك حزن أم أنه ألم بعينيها ولكن كنت أحس
بأنها تصرخ بداخلها

المهم جاء اليوم الذي شاء فيه السميع العليم أن يعطيني الفرصة
بأن أتكلم مع هذه الأم الطيبه
وجدتها تجلس أمام أحد المحلات وتضع أمامها المناديل
تقدمت نحوها
وقلت لها : مالك يا أمي وأيه حكايتك بالظبط
قالت : أنا يابني إسمي عواطف أم عادل
قلت لها : أيوا يا أمي بس بشوف حزن في عينيكي مالك
قالت : أنا يا أبني ساكنه هنا – يدها تشير علي إلي متفرعه من الشارع –  ساكنه في أوضه متر في متر تحت السلم
جوزي متوفي وعندي ولدين وبنت
إبني الكبير متجوز ومخلف بس إتحبس في قضية مخدرات كان معزوم في فرح
وخدوه في الرجلين ومراته من ساعة ما أتحبس رمت لي العيال وقالت لي ماليش دعوة بيهم
وإبني الوسطاني من ساعة ما أتجوز وهو لو شافني قدامه مابيقوليش السلام عليكم
وبنتي متجوزه وحالها حال وبتصرف علي عيالها وأهي بتيجي تشوفني لما الظروف بتسمح وتمشي تاني

بأخد معاش من الحكومة كل شهر 120 جنيه من المعاشات
ويكفي بس يابني المشوار والله وهدت الحيل اللي بشوفها عشان أجيبهم
بهدلة المواصلات والمعاشات
الحمد لله يابني علي كل حال

لاحظت إن عينها بدأت تلمع ودموعها بدأت تنزل عندما تذكرت همها

قلت لها : يا أمي بس والله مافي حاجه تستحق دمعتك
وسيبيها علي الله يا أمي

قالت لي : يابني أنا الحمد لله مستوره معايا بس عيال أبني
أعمل أيه بس ولازم كمان أروح لأبني أزوره وبيحتاج فلوس
ويشتمني لو مديتهوش فلوس
والمحامي  نهب فلوسنا وكل شوية يقول بدرس القضيه
وحسبي الله ونعم الوكيل

المهم تركتها بعد ما سمعت منها حكايتها وكنت أطمئن بين الحين والأخر
عليها وأري حالها ولكم بعض المواقف

في أحد الأيام راجع في الشتاء اللي فات وكانت الدنيا ثلج بجد

بقولها : أيه ده إزيك يا حاجه عامله أيه وأيه اللي مطلعك بره كده بس في عز البرد ده
قالت لي : أصلي صايمه بكره وبعت واد يجيب ربع لبن للعيال وكوباية زبادي ليا
ولسه ماجاش لحد دلوقت وبشوفه
المهم الواد جه وخلاص وإطمئننت عليها وتركتها

في أحد الأيام كنت بقالي فترة طويلة ماشوفتهاش

قلت لها : كنت فين يا أمي أمال مش باينة بقالك كثير
قالت : البنت بنتي بنتها كانت راكبه توك توك ورايحة الإمتحان
وعملت حادثة وأهي في القصر العيني ودايخين بيها وبنعمل لها شرايح ومسامير في رجلها وحالتها تحزن وتشوهت خالص
بتحكي وهي بتعيط ومش قادره تمسك نفسها
سبحانك يارب

برضك موقف أخر
كانت قد إشتكت لي بأنها تنام علي البلاط وأملها في الدنيا مرتبة تنام عليها
واحد صاحبي سمع الحكايه إدي لها فلوس تجيب المرتبة
المهم ياسيدي بعدها قابلتها
قلت لها : إزيك يا أمي وشكلك ماله هل جبتي المرتبه
قالت وهي تبكي : الواد إبني الصغير سرقني دخل جوا لقي فلوس المرتبة
في الدولاب خدها وخد موبايل أخته كمان ومشي
ربنا يهديه يارب

موقف أخر
تقول عندما قابلتها : عيال إبني عاملين عليهم مجاميع في المدرسة وإجباري أجيب منين يارب بس يعني الواد الصغير عايز 50 جنيه في الشهر ومفيش حد بيرحم
أعمل أيه بس كل اللي عليهم عايزين ومحدش بيسأل فيا
والله ما عارفه أجيب منين يابني

تحضرني بقي موقف لهذه السيدة مع أحد الجمعيات الخيرية

كلمت أحد الجمعيات الخيرية عنها من سنتين وقالوا هنبعت حد يعمل معاها بحث
وبعت لهم واحد صاحبي اللي هو بتاع فلوس المرتبه لأنه عضو في هذه الجمعية التي تظهر إعلاناتها في التليفزيون والجرائد ولكن لم يعبروني وكنت أعلم أنهم لن يسألوا في أيضا لأني كنت عضوا في هذه الجمعية الخيرية كما يقولون جمعية كل واحد علي مزاجه
كله بيروح عشان يشقط حريم بس أهو يقولك أخد واحده محترمه ماهي رايحة جمعية خيرية يبقي الواحد يروح ويختار وطبعا كله بيروح عشان يصاحب بنت حلوة وكويسه
بقي ماهي بترعي أيتام وفي ظرف شهر ماتلاقيش الأخت المتطوعه ولا العضو الجميل
لأن الإثنين خلاص بقي بقوا مأنتمين مع بعض

والمواقف لا تنتهي مع هذه السيده
دلوقت بقي هتسألوا أنا كاتب الموضوع ده ليه
عشان ياسيدي إنت وهو ما تترددوش لو شفتوا حد محتاج جنبكم
ولو حتي جاركم ماتترددش إنك تسأله وتقوله مالك
حاول تساعده خفف عنه همه علي الأقل
وما تثقش في أي جمعية خيرية والسلام خليك في الجامع اللي جنب بيتك
خليك في دور حفظ قرأن تتبرع لها حاجات مضمونه
ومعلش لأني جربت كثير وعشان ماينضحكش عليك وتوصل الفلوس للي يستحقها كمان

وكمان في حاجه بدل ما تشغل نفسك في المنتديات الإسلامية والمواقع
اللي طبعا سعادتك هتقضي وقتك فيها كلها
copy & paste
وتفضل مستني الردود والكلام الفارغ والمديح في سعادتك
وجزاك الله خيرا وجزانا وإياكم وكلام النت اللي ماينفعش ده
شوف عمل خير وإعمله وسيبك من الكلام ده
إنزل وشوف ماتكسفش
والله دعوة واحده بس من واحد محتاج ليك أفضل من الكلام
والرياء اللي بتعمله ومش معني إنك تعمل خير تذيع بقي
خليها في سرك