خراب يادنيا عمار يادماغي

- الغيارات الداخلية بس بكمية كبيرة وحاول تجيبها ملونة
لأن سعادتك فعلا فعلا هتغير كثير جدا

- عدة حلاقة شاملة طبعا معجون حلاقة وماكينه وفرشاه
بس نصيحه بجد هات عدة حلاقة نضيفة عشان الذقن
بيتهري من كثرة الحلاقة والإلتهابات هتكتر من كثرة الحلاقة
لأن ماينفعش تبقي ذقنك طويلة

- صابونة ديتول وزجاجة ديتول ومناديل مبللة ديتول هتفيدك جدا
وخد معاك بكر مناديل وكيس مسحوق غسيل عشان هتغسل ياحبيبي
وماتستغربش

- خد معاك أي برفان أو بادي سبراي زي أكس مثلا مايكونش غالي
بس عشان الريحة أو ريكسونا وهات معاك كمان بودرة الرجل بتاعة إيفا
بكثير هتفيدك جدا وبلاش فيبكس بتاع الرجل وحش ومش هيريح
ممكن فيبكس بتاع العرق كويس شوية

- ورنيش كويس بس في ورنيش حلو إسمه سيلفر هتلاقيه عند البياعيين السريحه
والإكشاك اللي في وسط البلد

- وحاجه مهمة جدااااا لو دخلت في الشتاء وهو الكالسون عشان الجو البرد
ضروري تجيبه

- الأدوية لازم تبقي معاك
كيتوفان للصداع والألم
كونجستال أو نوفلو للبرد
مضاد حيوي
أنتينال مهم جدا
بران كبسول عشان نقص الألياف
ولو فيتامينات كمان يبقي تمام
مرهم تينيا كيور عشان التينيا
ومرهم تسلخات زي كينا كومب
ورباط ضغط ومرهم للكدمات والعضلات

- في حاجات مهمه معلقة وقصافة أظافر وفتاحة علب تونة

- هات حتة خرطوم طولها متر مش هقول هتستخدمها في أيه
إنت هتعرف بعدين

- عدد 2 قفل بس ياريت يكون نحاس يعني غالي ومايكونش أقفال صيني
اللي مفاتيحها بتفتح علي بعض دي بلاش
وحاول تجيبه قبل صغير أوي أو وسط

- منبه وساعة كمان وقلم عادي وقلم ماركر طخين وكراسة وممكن راديو بس مش كاسيت راديو بس

بص ياسيدي سعادتك مش هتحتاج حاجه تاني لأنك هتأخد مخلة ماتنساش يعني
ماتجيبش شنطة كبيرة معاك ولو جبت رجعها مع أهلك في أول زيارة ليهم

الفوط وملاية السرير وكيس المخده والبيجامات اللي هتتام بيها وكل حاجه
هتأخدها ماتخافش يبقي مش هتحتاج حاجه المخلة كبيرة وهتأخد دولاب
كمان خاص بيك

ولو عايز تجيب حاجه تذاكر فيها مفيش مشاكل ممكن يجيلك وقت
تكون عايز فيه تذاكر أو تقرا حاجه وهيعدي عليك كثير
وقت تكون فيه عايز تقرا ولو حتي قصص

التليفونات هات معاك كروت ميناتل ورينجو لأن معرفش مركز
تدريبك هيكون فيه كابينة أيه بالظبط

ماتجيبش معاك موبايل ولا لبس ملكي سعادتك في أول زيارة
هتدي اللبس الملكي اللي كنت مترحل بيه لأهلك

- هتروح بقي تنطلق لمنطقة تجنيدك
بس المهم تروح بدري يعني الساعة 6 الصبح تكون هناك
أنا بتكلم بقي عن الهايكستب تركب الأوتوبيس أبو ربع جنيه
اللي هيدخلك جوا

-هتنزل تقف فدام باب كده هيجمعكم صف
هتقولوا جاي أقدم ورقي وميعاد كشفي النهادره

- هيدخلكم صف المهم حضر في جيبك 4 جنيه رسوم تصوير
بعد كده هتروح تقعد تحت مظلة ماشي وهييجي عسكري

- يقولك ترتيب الورق خلي بالك جدا من ترتيب الورق
ولازم تكون قبلها مصور كل الورق اللي معاك ورقة ورقة 10 صور
ماشي عشان هتحتاجهم جدا وصور ال 6 جند اللي معاك
وبطاقتك الشخصية كمان وأهم حاجة يكون معاك بطاقتك اليوم ده

- بعد ما ترتب ورقك هيقولك ( لو إنت مؤهل عالي ) إكتب ورا صورة من
شهادة التخرج الإقرار ده والإقرار ده إنك تكون ضابط إحتياط وكده
بس هتكتبه علي أكثر من صورة من شهادة المؤهل علي الضهر
وتشيلهم معاك وهييجي دورهم

- حاول يكون معاك دباسة اليوم ده وهو هيلف عليكم يأخد منكم الورق
والبطاقة الشخصية بتاعتك كمان وماتخافش هتأخدها تاني

- هييجي دورك في الدخول لقاعة التصوير هتخش جوا مجموعة مجموعة
تنتظر بالداخل عقبال ما يتم إدراجك في الكمبيوتر وهينادي علي إسم
إسم ولما ييجي إسمك هتروح تأخد البطاقة وتخش تلبس جاكت زيتي كده
وتتصور بيه بعدها هتطلع من جوا يوقفكوا مجموعة

- هتروح تنتظر في مظلة صغيرة كده أمام مبني الكشف الطبي
وهيوزعوا عليك ورقة فيها جميع الفحوص اللي هيعملوها
أوعي تتغابي وترميها

- هتخش جوا هتقلع هدومك كلها وتقعد بالشورت هتكون إتوزنت في التصوير
ومكتوب الوزن والطول خلاص عشان الناس اللي بتخرج وزن

- هتلاقي دكتور يطلع لك يقول كل الأمراض دي لو حد بيشتكي منها يقول
عشان يحولك لجنة عليا

- هتخلص الكشف بتاعك وهتنتظر المجموعة بتاعتك تخلص تقوم خارج
تلبس في صاله كده

- هتطلع علي الإنتقاء والتوجيه ومعاك الإقرار ده والبطاقة الخضراء
ماشي هتخش تقف طابور عشان تدخل ممكن تكون بياناتك إتأخرت علي الشبكة
مش مهم عادي أصبر بس 10 دقايق وهتلاقيهم بينادوا المجموعة اللي نزلت
علي الشبكة وهتخش يأخد منك كل الورق ده اللي هو الإقرار والبطاقة الخضراء

- بعدها بقي يبقي كده خلصت يومك ومنتظر نموذج 110 وهو ده خلاصة اليوم
هتقعد في المظلة ومجموعة مجموعة من الناس هيطلع ال 110 بتاعتها
وبس خلص اليوم

بس في كلام لازم يتقال
- اللي يقولك إتخن وبتاع عشان تخرج من الجيش ده مابيفهمش
لأن كله قسمة ونصيب

- اللي يقولك أخرجك من الجيش بس عايز مبلغ ده نصاب
لأن مفيش حد بيطلع حد من الجيش خليها حلقة في ودنك
وأنا عارف إن كل الكلام ده هتسمعه وهتسمع أساطير
وحكايات عن ناس خرجوا بالوسايط وأنا بقولك
كلها أي كلام لأن معايا في الجيش أولاد رتب عالية أوي
في الجيش ومعايا

- بالنسبة ليوم الكشف حضر معاك حاجه تخرجك من الملل
خد معاك ميه ساقعة لو في الصيف يعني
خد معاك أكلك وعصير وكده
حاول تلبس لبس مريح ياريت يكون رياضي

المرة الجاية هتكلم علي يوم الإرجا
بإذن الله

وأول حاجه قلت نكتبها هي أول حاجة بتعملها كشاب
تبدأ تحضر الأوراق المطلوبه منك للتجنيد
وهي كالتالي

- صور شخصية خلفيه بيضاء بدون دقن 4*6

- مستخرج رسمي لشهادة الميلاد من السجل المدني
ونصيحة مني طلع أكثر من مستخرج لأنك هتحتاجهم

- أصل شهادة المؤهل
أي جامعة بتخرج 3 شهادات تخرج بتتقسم كالتالي
شهادة للنقاية أو الشغل
شهادة للتجنيد
شهادة للترحيل لو دخلت الجيش

- نموذج ال 6 جند وده المفروض يكون معاك
ولو مش معاك تسحب نموذج 7 جند من مندوب التجنيد وتملاه
وتروح منطقة التجنيد تخرج بدل فاقد بس أهم شيئ
تكون عارف الرقم الثلاثي ولو مش عارفة تروح بقي العباسية
وتشوف الرقم ثاني

- فصيلة الدم لازم تكون من مستشفي حكومي عشان ختم النسر
ومش هيعترف بأي ورقة لفصيلة الدم مش عليها ختم النسر

- فيش جنائي من القسم برضوا وإعمله مستعجل أحسن
ولو لبست جيش خلاص يبقي تعمل واحد تاني

لما هتقدم كل الورق ده لمندوب التجنيد هيطلب رقم تليفونك
وخلي معاك بطاقتك عشان تقولوا العنوان اللي فيها ويتأكد
لأنه بيدونه
هيقوم مطلع لك حاجه إسمها أيه بقي
- الفيش العسكري سعادتك هتفيش وتروح تختمه برضك
من مندوب التجنيد ومأمور القسم
بس هترجع له تاني بكل الورق ده مع الفيش في نفس الوقت
هيديك بطاقة خضراء كده تحافظ عليها زي عينك وهيديك كل الورق تاني
بس هيكون مدون علي البطاقة الخضراء دي ميعادك اللي تكون فيه في منطقة
تجنيدك حالق ومظبط نفسك